मराठी माणसाच्या या मराठीसृष्टीत आपलं स्वागत. एक नवीन विषय आणि संकल्पना घेउन आम्ही तुमच्याकडे आलोय. मराठीत वेबसाईटस हा काही आता नाविन्याचा भाग राहिला नाही. पण जेव्हा ही साईट प्रथमच सुरु झाली तेव्हा इंटरनेटवर मराठी भाषा हे नाविन्यच होतं. तेव्हापासून अगदी आजतागायत आम्ही इंटरनेटवरच्या शेकडो साईटसना तंत्रज्ञानाचं पाठबळ दिलंय... अगदी सुप्रसिद्ध वर्तमानपत्र `लोकमत'पासून ते अनेक छोट्या छोट्या साईटसपर्यंत.

आपण म्हणाल, मराठी वेबसाईटसच्या सगळ्या भाउगर्दीत ही आणखी एक भर कशासाठी? याचं उत्तर आपल्याला थोड्याच दिवसात मिळेल मंडळी. ही साईट वेगळी आहे हे तर खरंच पण ती इतकी वेगळी असेल की आपल्याला एक वेगळाच आनंद मिळेल.

इंटरनेटवरच्या लाखो करोडो पानांमध्ये मराठी पाने किती असा आपल्याला कधी प्रश्न पडलाय का? आम्हाला असा प्रश्न वारंवार पडतो आणि आम्ही अस्वस्थ होतो. काही शेकडा वेबसाईटस किंवा ब्लॉग्स आणि काही हजार पाने याच्यापुढे काही आपल्या मायबोली मराठीची उडी गेलेली नाही. विकिपिडियामध्ये मराठी भाषेबाबत पानेच्या पाने उपलब्ध आहेत. त्यावर आता नियमितपणे भरही पडतेय. मायबोली, मनोगत वगैरे साईटसनाही भरपूर प्रतिसाद मिळतोय. मग आता हे नवीन साईटचं काय खूळ? मंडळी मराठी वेबसाईटसना मिळणारा प्रतिसाद सध्या आपल्याला भरपूर वाटत असला तरीही तो खरंच भरपूर आहे का? याचा विचार करायलाच हवा. सध्या उपलब्ध असलेल्या सगळ्या साईटस या काही विषय डोळ्यासमोर ठेउन तयार केलेल्या आहेत. सोशल नेटवर्कींग हा या बहुतेक सर्व साईटसचा मुख्य उद्देश... आणि अर्थात तो उद्देश चांगलाच आहे. पण तेवढ्यानेच पुरे आहे का? मराठी साईटसवर नियमितपणे किती लोक येतात ते पहायलाच पाहिजे ना?

यावर उपाय काढण्यासाठी काही योजना आम्ही आपल्यासमोर आणतोय. सुमारे एक लाखांहून जास्त पानांचा मजकूर आपल्याला लवकरच खुला होणार आहे. आणि हो.... हा सगळा मजकूर आमच्या साईटचा असेल असा दावा आम्ही करतच नाही. मात्र या मजकूराला आपल्यापर्यंत पोहोचवण्यात तुमच्या-आमच्या मराठीसृष्टीचा मोलाचा वाटा असेल हे मात्र निश्चित.

तुम्हाला लिखाणाची आवड असेल तर आम्हाला जरुर कळवा. आपल्यासाठी सर्व ती लेखन-आयुधे घेउन आम्ही तुमच्याकडे येउ. इंटरनेटवरच्या लेखनसामुग्रीची ओळखही आपण लवकरंच करुन घेणार आहोत.

साईटवरुन एक फेरफटका मारा..... बघा आतमध्ये काय काय आहे ते!