मराठीत लेखन करायचं म्हणजे फारच कठीण.. किचकट काम... असाच एक गैरसमज अनेकजणांमध्ये आहे. एके काळी ते तसं होतं पण आता नाही. संगणकावर मराठीत काम करणं कठीणही राहिलेलं नाही आणि किचकटही. यासाठी अनेक आयुधं आता आपल्या हातात आहेत. यातली काही मोफत आहेत तर काही विकत घ्यावी लागतात. आता तुम्ही म्हणाल की मोफत ऊपलब्ध असताना विकतची का बरं घ्यायची? पण खरंतर सगळ्यांची आपआपली वैशिष्ट्यं आहेत आणि त्यांचीच ओळख या विभागात होईल.

इंटरनेटवर काम करण्यासाठी युनिकोडचा वापर आता सर्वत्र होतोच आहे. हे युनिकोड म्हणजे काय तेही जाणून घेउया. युनिकोडचा वापर एका विशिष्ट मर्यादेपर्यंत ठीक आहे पण पुढे काय? इंटरनेटव्यतिरिक्तच्या कामासाठी युनिकोडचा खरंच उपयोग होतोय का हेसुद्धा अभ्यासायला हवेच की. प्रकाशन व्यवसायात साधारणपणे पेजमेकर आणि क्वार्क एक्सप्रेस ही दोन सॉफ्टवेअर मोठ्या प्रमाणात वापरली जातात. या सॉफ्टवेअरमध्ये युनिकोडमध्ये काम करायची सोयच नाही मुळी. युनिकोड-युनिकोडचा पाढा वाचणार्‍या मंडळींनी याचाही विचार करायला पाहिजे.

युनिकोडचे महत्त्व आहेच पण तसेच महत्त्व युनिकोडव्यतिरिक्तच्या फॉन्टसचेही आहे हे विसरुन चालणार नाही.

१९९५ साली जेव्हा भारतीय भाषांमधे इंटरनेटसाठी तंत्रज्ञान घेउन आम्ही जगासमोर आलो त्यावेळेपासून हेच म्हणत होतो की भारतीय भाषांसाठी मोठ्या प्रमाणावर सेवा-सुविधा उपलब्ध झाल्या तरच या भाषांना डिजिटल युगात मोठ्या संधी आहेत. मराठी, हिंदी, गुजराती या भाषांसाठी विविध सॉफ्टवेअर कंपन्यांनी तंत्रज्ञान बनविलेले आहेच. यामध्ये साध्या टायपिंगपासून स्पेलचेकर म्हणजेच मुद्रितशोधन, भाषांतरण वगैरे बर्‍याच गोष्टी आल्या. दुसरे म्हणजे, वर्षानुवर्षे वेगवेगळ्या फॉन्टसमध्ये बनविला गेलेला हजारो-लाखो पानांचा मजकूर आता इंटरनेटवर वापरायचा तर त्याचीही सोय हवी. अशी सोयही आता उपलब्ध आहे. भाषांतर वगैरेसारख्या बाबीही आता संगणकावर करता येतात. तेव्हा त्याचीही ओळख करुन घ्यायला हवी.

हेच सर्व आता आपल्यासाठी उपलब्ध होत आहे मराठीसृष्टीद्वारे. मराठीसृष्टीच्या ब्लॉगवर आपल्याला या विषयावर बरंच काही सापडेल. आणि त्याचबरोबर इतरांनीही लिहिलेल्या विविध साईटसवरच्या या संदर्भातल्या लेखांना आम्ही तुमच्यापर्यंत वेळोवेळी आणणार आहोत.

यासाठी नियमितपणे मराठीसृष्टीच्या या संकेतस्थळावर यायला हवे.