मराठीत काम करण्यासाठी आता अनेक सॉफ्टवेअर उपलब्ध आहेत. मोफत असलेल्या बराहपासून ते विकत घ्यायच्या आकृती, श्रीलिपी पर्यंत. प्रत्येकाचे काही ना काही वैशिष्ट्य.. काही खुबी. फुकट मिळणारं सगळंच उत्तम असंतं असं तर नाही ना? आणि चांगलंचुंगलं द्यायचं असेल तर त्यासाठी काम, मेहनत आलीच. मग ज्या कंपन्या किंवा सॉफ्टवेअर व्यावसायिक या चांगल्या गोष्टी तुमच्यापर्यंत पोहोचवतात त्यांनी थोडेफार पैसे घेतले तर बिघडलं कुठे? अर्थात हे करताना अवाच्या-सवा पैसे मोजायचं काहीच कारण नाही हे सुद्धा महत्त्वाचं.

मराठीमध्ये काम करण्यासाठी ज्या अनेक सॉफ्टवेअर कंपन्यांनी आजपर्यंत प्रयत्न केले त्यांचे कौतुक तर करायलाच पाहिजे. यातल्या बहुतांश कंपन्या या प्रायव्हेट सेक्टरमधल्याच. सरकारी स्तरावर काम करणारी एकमेव... ती म्हणजे सी-डॅक. त्यानंतरच्या काळात विविध ठिकाणच्या आयआयटीमधून या विषयावर काम सुरु झालं. हा इतिहासही बघायला गेलात तर फार मनोरंजक माहिती आपल्यासमोर येईल. भारतीय भाषामधील सॉफ्टवेअर तंत्रज्ञान, वेब साईटसची वाटचाल या विषयांवर आमच्या टिममधल्या तंत्रज्ञांनी कित्येक वर्षे अभ्यास केलाय. या विषयात स्वतःला झोकूनही दिलंय. त्यामुळे आम्ही सर्वजण एका परिने या इतिहासाचे साक्षीदार आणि या इतिहासातली पात्रेही आहोत.

मराठीसाठी देवनागरी लिपीचा वापर होतो. त्यामुळे मराठीत काम करणं म्हणजे खरंतर देवनागरी लिपीत काम करणं. आता यामुळे मराठीचा काही प्रमाणात फायदा जसा झाला तसं थोडं नुकसानही झालंय. देवनागरी लिपीचा वापर मराठी लेखनासाठी केला जात असल्याने मराठी भाषेच्या प्रगतीत बाधा आली असा युक्तिवाद करणारी मंडळीही आपल्यात आहेत. त्यांचं म्हणणं अगदीच दुर्लक्ष करण्यासारखं नाही. त्याबद्दलही नंतर कधीतरी......

हे सर्व तर आपण करणारच आहोत, पण थोड्या प्रतिक्षेनंतर. आधी साध्या सोप्या गोष्टी बघूया. वेळोवेळी या संकेतस्थळावर विविधांगी माहिती घेउन आम्ही येतच आहोत. तेव्हा पुन्हा जरुर या... आपल्याला मराठीसृष्टीकडून शुभेच्छा.... Happy Computing... in Marathi.